SMART TECHNOLOGY

Smart lam pum chu Self-Monitoring, Analysis, and Reporting Technology a ni. A awmzia ber chu Computer anga internet hmanga connect theihtura Internet Protocol (IP) Address nei leh atul apiang rang taka buaipuitu( Processor) leh data dahkhawmna ( Storage media) tha tak nei sawina a ni. Tin, smart device hian a huam zau hle a, wireless a thlunzawm(network) theih leh hmanraw pakhat atanga hmanraw danga information in pektawn (Sharing) theih a ni bawk. Hei bakah hmun dang atanga hman leh thunun theih( Remote Access & Control) tura sensor leh chhinchhiahna (Unique indentification) nei thlap a ni bawk.

Smart Technology hi tunlaiah chuan IoT(Internet of Things) hmanga siam deuh vek a ni. IoT hian a tum ber chu radio frequency identification (RFID) technology mihring, mechanical & digital machines leh ransa thlenga Unique Identifiers (UIDs) hmanga Mihring leh mihring (human-to-human) leh Mihring leh Khawl (human-to-Machine) inbiak kher ngailova, khawl leh khawl (Machine -Machine) in be tawn thei tura thlunzawm (Network) a ni. Network huam chhungah internet kaltlangin hmanraw hrang hrang te a control theih bakah information pawimawh khawlkhawm leh inthawn tawn theih a ni bawk

Tun hma lama kan hriat ngai loh Smart technology thil thar tam tak kan hre chho zel a. Van sang atanga thlalakna (Drones), Automatic Teller Machine (ATM), Smart Utilities & Energy meter, Smart TV, Closed Circuit TV ( CCTV) camera leh hmanraw changkang tak tak kan mit ngeiin kan hmu ve ta. Heng te hi IoTs real time example vek an ni. Kum 1982 khan Carnegie Mellon University ,USA ah internet atanga control theih turin Coke machine an siam a, hei hi khawvel Internet-connected appliance hmasa ber a ni. June 2000 khan LG Internet Digital DIOS te chuan Internet connect theihna Local area network ports nen Internet-connected refrigerator an siam a. Hei hi khawvel a IoT hmasa ber a ni.

21 Century kan thlen meuh chuan technology hmasawnna a sang hle mai a, Keini mizo mipui te pawhin Smart Technology kan hmang hnem ta hle mai. Tunlaia kan hmelhriat Smart Technology hmanraw langsar zual te :

1. Smartphone:Tunlaia kan mobile hman ang chi Android, Symbian, iOS, BlackBerry OS e.t.c.

2. Smartwatch : Hei hi Mobile phone bun chi(Wearable) tiin an sawi bawk. Chi hrang hrang a awm a, a tlangpuiin cell phone, calculator, camera, GPS navigation, SD card, touchscreen e.t.c a nei vek a ni.

3. Smart City: Smart Technology hmanga khawpui inrelbawldan leh mipuite nunphung tihmasawn tura Information and communication technologies thiamna hman tangkai hi a tum ber a ni.

4. Smart television : connected TV /Hybrid TV tiin an sawi bawk. Computer ang maia processor, memory leh Application software a awm a, Internet browsing, YouTube video Streaming a tih theih. tunlai Smart TV tam ber hian Mobile operating systems: Android, Symbian, iOS, BlackBerry OS .e.t.c an hmang.

5. Smart Key: Tunlaia automobile chahbi radio frequency (RF) signals hmanga te hi an ni. Nakin ah chuan Building Kawngka kalh nan pawh kan la hmang fur dawn a ni.

6. Smart Refrigerator: Tunlaia LCD Display hmangin temparature control theih ang chi te hi an ni. Tin, high-tech programmed refrigerator a awm leh bawk. HEngah phei hi chuan kawngkhar hawng kher lo pawhin a chhungah enge awm a hriat theih vek a, items expiry date thlengin a chhut thei vek a ni.

Tin, Power & Electricity hmanraw hrang hrang te pawh Smart Technology heng Smart light bulbs, Smart street lighting systems, Smart meters, Smart sockets Smart Grid .e.tc hmanga upgrade a ni bawk .

Hetih lai hian keimahni kan SMART leh si lo hi a buaithlak lai ber a ni. Hmanraw SMART tak tak kan tuipui em em te hian mimal, chhungkua, khawtlang leh rinna lamah hmasawnna leh hlawkna min pe em tih te pawh hi ngaihtuah tham tak a ni ta. Rilru Smart takin Smart Technology hmanrua hmang ila a duhawm hle mai.